BloombergNEF-ийн саяхан судалгаагаар 2026 онд дэлхий даяар 158 гигаватт/459 гигаватт цаг (GW/GWh) чадалтай эрчим хүчний хадгалалтын систем шинээр байрлагдагдахаар төсөөлж байна. Энэ нь 2025 оны дээд амжилт болох 112GW/307GWh-аас 41%-иар өссөн үзүүлэлт юм.
Хятад, АНУ тэргүүлсээр
2025 онд Хятад улс 61.1GW/173.1GWh хадгалалтын хүчин чадал нэмж, өмнөх оноос 54%-иар өссөн бол АНУ 18GW/54.6GWh нэмж, 46%-иар өссөн байна. Эдгээр хоёр орон 2025 оны дэлхийн нийт суурилуулалтын 70 орчим хувийг дангаараа эзэлж байв. BloombergNEF таамаглаж байгаагаар Хятад 2036 он гэхэд 1.3TW/5.2TWh, АНУ 334GW/1.3TWh чадалд хүрнэ.
Африк, Европ, Дундад Дорнодод хурдацтай өсөлт
Сахарын цөлөөс өмнөх Африкт хадгалалтын хүчин чадал 2025 онд өмнөх оноос дөрөв дахин өсч, 4.3GW/8.8GWh болжээ. Европт Герман тэргүүлж, ихэвчлэн орон сууцны батарейнаас бүрдэх 3.8GW/7.6GWh суурилуулсан бол Дундад Дорнодод Саудын Араб 2.1GW/7.8GWh-аар тэргүүлж байна.
Технологийн чиг хандлага
Литий-төмрийн фосфат (LFP) батарей зах зээлд тэргүүлсэн хэвээр байгаа бол урт хугацааны (long-duration) хадгалалтын технологийн эзлэх хувь одоогийн 3%-иас 13% хүртэл өснө гэж таамаглаж байна. Мөн натрийн ионы (sodium-ion) батарей томоохон нийлүүлэлтийн гэрээнүүдийн ачаар зах зээлд илүү бат бэх суурьшиж байна.
BloombergNEF-ийн урт хугацааны төсөөллөөр ирэх арван жилд жил бүрийн нэмэлт хүчин чадал бараг хоёр дахин нэмэгдэж, 2036 он гэхэд жилд 308GW хүрэх бөгөөд дэлхийн нийт хуримтлагдсан хүчин чадал 2.9TW/10.5TWh-д хүрнэ.
Сэтгэгдэл үлдээх
Таны имэйл хаяг нийтлэгдэхгүй. Заавал бөглөх талбарууд * тэмдэглэгээтэй
