АНУ-ын хамгийн том цахилгааны дамжуулах системийн оператор компаниудын нэг PJM Interconnection удирдах зөвлөл сүүлийн чадлын дуудлага худалдаанд илэрсэн 6.8 гигаваттын нөөц чадлын дутагдлыг нөхөх зорилгоор 2026 оны 9-р сарын 30-наас 10-р сарын 21 хүртэл нэмэлт "backstop" дуудлага худалдаа зохион байгуулахаар шийдвэрлэлээ. Ялагч нар 15 жилийн хугацаатай гэрээ байгуулж, 2032 оны 6-р сарын 1 гэхэд шинэ хүчин чадлаа ашиглалтад оруулах шаардлагатай бөгөөд үнийн дээд хязгаарыг МВт-өдөрт 325 доллараас 555 доллар болгож нэмэгдүүлжээ. Charles River Associates зөвлөх компани хоёр талын гэрээний зохицуулалтыг хариуцаж, эхний тохиролцоонууд 8-р сард гарсан байна.
Үүнтэй зэрэгцээ PJM 6-р сарын 1-нээс хүчин төгөлдөр болох "Interim Resource Adequacy Service" (IRAS) нэртэй шинэ механизмаар дамжуулан дата төвүүдийн ачааллыг хязгаарлах эрх авлаа — сүлжээ онцгой байдалд ойртох үед шинэ эх үүсвэргүй том хэрэглэгчид ачаалалаа бууруулах эсвэл нөөц эх үүсвэрээ ажиллуулах шаардлагатай болно. PJM мөн байршил, ачааллын хуваарь, өөрийн нөөц хүчин чадлыг бүртгэх том хэрэглэгчдийн бүртгэлийг үүсгэж байна. Байгууллага өөрийн 13 муж, Вашингтон ДС-г хамарсан бүсэд том ачаалал 2038 он гэхэд 70 ГВт-аар өсч болзошгүй гэж тооцоолж байна.
Monitoring Analytics зах зээлийн хянагч байгууллагын Жозеф Боуринг сүүлийн дөрвөн дуудлага худалдаанд дата төвүүдийн эрэлт 29.4 тэрбум долларын нэмэлт зардал бий болгосон гэж тэмдэглэсэн бол Aurora Energy Research-ийн Жулиа Хоос "хэрэв бүх том ачаалал ирвэл энэ нөөц хангалтгүй байх магадлалтай" гэж анхааруулав. PJM-ийн удирдах зөвлөл "шинэ эх үүсвэр авчрахгүй том ачааллын улмаас өссөн зардлыг одоо байгаа хэрэглэгчид үүрч болохгүй" гэдгээ мэдэгдлээ.
Эх сурвалж: Utility Dive.
Сэтгэгдэл үлдээх
Таны имэйл хаяг нийтлэгдэхгүй. Заавал бөглөх талбарууд * тэмдэглэгээтэй
